Rolf-Erik Nystrøm og Einy Åm Spark
eit improvisasjonsverk til Botnasanden
torsdag 27. juni kl. 19.00
Botnasanden,
ved Rotevatnet i Volda
Ein av Noregs fremste saksofonistar, Rolf-Erik Nystrøm og dansar Einy Åm Sparks skaper eit improvisatorisk kunstverk til Rotevatnet og Botnasanden denne kvelden, eit samspel mellom dei to og naturen sjølv, ei oppleving du kan få berre denne eine kvelden.
Botnasanden, ved Rotevatnet i Volda, har vore med tonehimmel sidan oppstarten i 2022 og er ein stad både vi og mange andre voldingar er glade i. No lar vi stranda, skogen, utsikta og alle lydane her få spele saman med to fantastiske kunstnarar, i eit samspel som vi håper vil gje oss alle rom både til å føle, tenkje, vere og drøyme.
Konserten lages i samarbeid med Jazzklubben Volda Ørsta.
Rolf-Erik Nystrømer ein av dei leiande saksofonistane innan samtidsmusikk og improvisasjon i Noreg og internasjonalt. Han har utvikla fleire nye speleteknikkar for instrumentet, og har ei eiga evne til å ta til seg nye uttrykk og sjangrar, alltid med sitt eige særpreg. Nystrøm har spelt på over hundre album og har urframført omtrent like mange verk over heile verda, mange av dei skrivne spesielt for han. Soloalbumet hans Concepts of Sorrows & Dangers (2006) fekk strålande kritikk i norske media og vart nominert til Spellemannspris. Han er fast medlem i ensembla POING, Seven Winds, Dozo, Hero, Nils Økland ensemble og Oslo sinfonietta.
Einy Åm Sparks er utøvande og skapande dansekunstnar, og har produsert og turnert fleire framsyningar både nasjonalt og internasjonalt. I 2011 oppretta ho EyeKnee Coordination, der kunstnariske samarbeid står sentralt i arbeidet og spenner om både dans, musikk, film og installasjon. Ho er spesielt interessert i å utforske kva som skjer i møtepunktet mellom daglege rørsler og dans, mellom dans og andre kunstartar, og i forholdet mellom utøvar, rom og publikum. Som ei forlenging av dansekunsten arbeider Sparks også med film og redigering, både innanfor dansefilm, dokumentarfilm og oppdragsfilm.
Kort om turen
Turen til Botnasanden er ein sentrumsnær og lett tilgjengeleg tur. Turen er på bilfri grusveg, og det er mange plassar ein kan stoppe for å raste, bade eller berre sitte og nyte naturen. På Botnasanden er det ein fin langgrunn sandstrand der det er fint å bade på sommarstid for store og små. Om du er ein ihuga heilårsbadar kan ein fint ta ein dukkert her på vinteren også! Sjølve turen startar ved badeplassen på Årneset.
Ruteskildring
Start ved parkeringsplassen på Årneset: Gå over ei lita bru og inn på ein grusa turveg. Følg denne til neste bru (ca 250 m), ta til venstre rett etter denne brua. Gå forbi Volda stadion på grus- og gangveg langs Rotevatnet.
Ved ei grind i austenden, går grusvegen over til asfaltert veg. Den fysiske koda er plassert i postkassa ved grinda. Sjølve Botnasanden er litt lenger framme og er eit fint utkikspunkt uover Volda sentrum.
Tilkomst og parkering
Du kan parkere på offentleg parkeringsplass på Årneset som er starten av turen. Det er også høve til å kjøre heilt fram til Botnasanden og parkere på oppmerka parkeringsplass der. Då kjører du på bilveg på nordsida av Rotevatnet, forbi golfbana og fram til Botnasanden.
.jpg)